Bärner Bärgloufcup

Ab sofort ist die Anmeldung für den Bärner Bärgloufcup 2021 möglich. Auch dieses Jahr ist die Anzahl der Cupstartplätze auf 200 limitiert. Sich schnell anzumelden lohnt sich!

Der nächste Bärner Bärgloufcup findet vom 9. - 13. August 2021 statt. Wir freuen uns! 😊

Bi schönstem Summerwätter isch dr Bärner Bärgloufcup 2020 am Ulmizberg z’End gange. Zum Abschluss hets o am Ulmizberg e nöii Bestmarke gä: D’Sarina Jenzer isch so schnäu wie niemer süsch i aune siebe Bärner Bärgloufcupusgabe im Ziel gsi. O der Dominik Rolli isch aus Erschte dobe gsi, allerdings ohni nöiem Streckerekord. Cupsieger isch der Dominik Rolli trotzdem hochverdient worde. Bi de Froue het d’Gertrud Wiedemann dr Cup gwunne – und das zum dritte Mau i Serie. Merci öich aune für ds Mitmache! Mir wünsche witerhin viu Lauffröid u hoffentlech bis zur nächschte Usgab im 2021!

Vermuetlech hei hüt d'Bei vode meischte Cup-TeilnehmerInne chli gsüürelet. Aui wo im Ziel no e chli Resärve hei gha u dr Turm erklumme hei, si miteme wunderschöne Usblick i d'Ferni belohnt worde. Für morn giuts nomau di allerletschte Chräft z'mobilisiere! Das giut im Spezieue für aui, wo no um ihre Schlussrang «fighte /schlegle» dörfe. E süessi Überraschig gits morn Abe für aui Teilnehmende. PS: D’Gertrud Wiedemann isch aus erschti Frou u der Dominik Rolli aus erschte Maa im Ziel ufem Bantiger gsi. Git’s am Ulmizberg äch dr 5. Streckerekord i Serie vom Dominik Rolli?

Wiene Perlechötti gsehts us, we dir i öine farbige T-Shirts ufgreielet de Fäuder entlang Richtig Bäupbärg springet. Am schnäuschte obe si der Dominik Rolli (ja, mit Streckerekord) u d'Gertrud Wiedemann gsi. Mir gratuliere natürlech o aune angere zu ihrer Leischtig. So viu strahlendi Gsichter überau - es macht Spass mit öich! 😊

Was isch o los? Dir syt aui so schnäu! Mir vermuete, dass dir d'Coronazyt für viu Trenings gnutzt heit u pünktlech zum Bärner Bärgloufcup i Beschtform syt. Jedefaus hei bir hütige Etappe sagehafti drei Froue u vier Manne di bisherige Streckerekörd ungerbote. Ab sofort heisse di nöie Rekordhauter uf d'Bütschelegg Lisa Holer u Dominik Rolli.

Lang heimer banged, ob der Bärner Bärgloufcup hüür cha stattfinde. Hüt isches losgange – u wie! 226 Läuferinne u Läufer hei em Räge trotzt u si der Gurte ufe gsprintet. Bsungers gleitig si derbi der Dominik Rolli u der Jonas Egger gsi, wo beidi der bishärig Streckerekord hei ungerbotte. Neu isch der Dominik Rolli der Maa wo’s z schla git – er het hüt 14 Minute u 35 Sekunde bis i ds Ziel bruucht. Bide Froue het mit der Gertrud Wiedemann e Altbekannti d'Ziellinie aus Erschti überquert.